702BB Christmas Party

生完後，透過FB認識702媽媽
大家每日係Whatsapp 都好多交流
開心唔開心都會分享互相支持

27 Dec 15 在我家樓下會所舉辦 702BB Christmas Party
好多BB 好熱鬧
一齊交換禮物 影相
四個鐘好快過

唔知佢地傾咩呢?

呢張大合照，好難先影到張

馬馬@ 3 months

好耐無寫BLOG，返工返學返實習返屋企仲要湊馬馬的日子實在太忙碌
幸好馬馬算是非常易湊，基本上除左肚餓同眼訓會喊
其餘時間都可以讓我地大人專心做自己野

食
已餵三個月人奶
仍然維持四個鐘五安，但最近開始有厭奶徵狀
周圍望，笑住又唔飲奶
試過硬要佢飲，就回吐之前既奶
最舒服係佢半睡半醒既時間餵

訓
平均都訓到十幾個鐘
半夜基本上無醒過 (最抵錫)

出街
呢個月出多左街
主要係晚上行下屋企附近商場
間中周圍望，好多時會係BB車訓覺
未識對玩具產生興趣

悲慘事：
剛好三個月我得了乳腺炎，從來無諗過發生係自己身上
因為定時泵奶
今次連續五日發燒
晚上發冷發熱，奶量大跌 (最唔開心)
由之前既三安，而家泵得半安
睇左兩次私家醫生再去健康院搵姑娘醫生
都係要食抗生素同埋必理痛
到而家仲食緊，嗚.....

馬馬@ 2 months

坐月的時間過得好快，好快又放完產假返工
實在好唔捨得離開馬馬
放工後都九秒九衝返屋企睇馬馬

馬馬食奶方面四個鐘五安，好合作
開始有眼神接觸，講多左野
開始會側身

馬馬滿月啦

馬馬終於滿月啦，過去一個月可以用「又忙又悶」形容
滿月當日同老公去BB展買物資
看過網床，PLAYMAT，又買一堆物品
逛了短短幾小時，已經很累
因為人多、又迫，沒什麼心機行
行到六點回家同馬馬慶祝滿月

晚上我們都只是簡簡單單一家人食飯聊天
馬馬就訓足全程
蛋糕好可愛喔  尤其是對鞋仔

感恩天父賜下可愛的馬馬
馬馬、爸爸媽媽永遠都愛妳
希望妳可以健康快樂地成長~

表情多多的馬馬

馬馬人仔細細，但已經很多表情
不少朋友見到都話馬馬好老積，而樣貌最似就係婆婆
二十日未夠就好似識聽人講野，對眼會望住你，
好似好識野咁。

飲食方面: 馬馬絕對係大食妹，未夠二十日已經可以飲四安奶
仲要食得好急，但又吞唔切，所以成日都嘔奶
我地嘗試逐安餵，一囉起奶樽又係喊得好大聲
佢仲緊張到會用小手捉住奶樽，同埋好好力

見馬馬食得、瞓得、痾得，作為父母就已經好滿足
而體重仍增長得非常理想~
希望馬馬都繼續身體健康

坐月

返到屋企，要一手一腳湊BB
作為新手父母，要照顧BB好狼狽
肯好有陪月幫手，向陪月學野
晚上就要自己黎

要照顧初生BB，最辛苦莫過於餵夜奶
日頭我就盡量泵奶，晚上就餵奶粉
幸好老公放產假同埋年假
可以幫手湊馬馬，心裡好佩服可以一個人湊BB的父母
亦好佩服全人奶的媽媽，可惜馬馬太大力，好多次都咬到我乳頭損
就算泵出黎都有血...

不過為左馬馬健康，我都要盡力泵奶，希望可以餵到佢有四餐

出世啦

生完馬馬，感受到身體很虛弱
返到病房，姑娘會先幫手照顧馬馬，我就立即休息訓覺
訓訓下，姑娘就將馬馬推黎床邊，叫我嘗試俾馬馬扒係我心口
再俾佢啜下乳頭，毫無經驗的我完全唔知點餵人奶

面對多一個生命，開始時個感覺都幾奇怪
覺得佢又陌生，但事實又係自己親生

中午時間，媽媽同老公都過左黎探我，
媽媽仲係我住院期間，日日煲湯過黎，好感動
而我就要學習照顧馬馬
公立醫院係要自己一手一腳攪掂
係半夜時間，姑娘聽到馬馬大喊好一段時間先會推走佢俾我休息
早上六點幾又會推返黎我床邊

由於醫院係唔會隨便補奶粉，我嘗試俾馬馬啜乳頭
希望可以快D上奶，又用手擠，但都係得一滴，兩滴
試過馬馬太肚餓，啜到佢成口血(但佢都照啜)，我個乳頭損左
姑娘先開始俾奶粉，馬馬係好大力。

探病時間都好多人黎，可惜每次只可以有兩個人探
個個都話我竟然生到七磅既囡，
因為照超聲波一路都話佢係細碼
六月初照個陣仲要未夠五磅
估唔到最後一個月追返磅數

我同馬馬住左三日兩夜就出院啦
三日兩夜可以講得係訓練營
完全唔識湊BB，到要自己學抱佢、餵奶、掃風、換片等
但個身體仲好弱，會陰傷口又痛又唔夠休息
   其實都幾辛苦

待產(下)

大約9:00，我就被推落產房，原來QE既產房設備好齊，好似私家產房
入到去，有大批醫護人員很快幫我落催生藥，另有醫生就幫我人手穿羊水，
同時有護士俾笑氣我聞，聞笑氣真係會令個人HIGH 哂，
醫生幫我穿水都唔覺痛。

做完所有事情，老公換好袍就入產房，
開始時，我們還看電視劇「點金勝手」，很輕鬆
但藥力很快見效，開始有陣痛，但很輕微
整個過程仍同老公有講有笑，
間中有助產士進產房，表示外面有部機會觀察到我的陣痛情況
又解釋過程有機會長達十二小時，因人而異。
當時我覺得如果持續這陣痛十二小時，我可以接受。

到了晚上十一點，陣痛的程度漸強
姑娘入到產房鼓勵我如果難忍痛楚就用笑氣
迷迷糊糊地我過了七小時
就有種急便便的感覺
不斷叫老公襟鐘叫姑娘入房
每次姑娘入房都答我‘：未生得!
心想：仲要我等幾耐，好辛苦
差不多五點半，姑娘終於叫我試下痾，每次痾都要HOLD 住十秒
我出盡力痾，但我只HOLD 到六秒就無氣
當時好想答佢：我痾唔出，不如開刀或者吸佢出黎
但我辛苦到一個宇都講唔到
結果用左個幾鐘去痾佢出黎
到最後，成班護士衝入黎，推我個肚，幫我推馬馬出黎
終於係7:52am 係順利出世

馬馬重: 3.19KG (有7磅) 好多頭髮
我覺得完成左創舉!

生完之後，聽到馬馬喊聲，
我覺得成個身體都唔係自己咁，成個人鬆哂。
跟住就係囉返個胎盤出黎同埋聯針
聯針時有打局部麻醉，所以唔係太痛

由於太累，影完全家幅，我已經無力去理馬馬
只係合埋眼訓覺。

休息一陣後就同馬馬上產後房

待產 (上)

話說我一直都希望如果作動，老公可以親自送我去醫院
1/7 個日公眾假期，個日早上，我同老公講好悶呀，唔知阿B幾時出世
跟住我就連廁所都洗埋，中午飯都未食就訓覺

訓完差不多兩點幾，老公要掠衫再同我出去行街，我就趁得閒去執信
點知去廁所後見紅，都幾多血，即刻出廳同老公講，我生得啦，見紅呀!

聽人講如果只係見紅而仲未生得就可能要出院，
不過我沖埋涼，洗埋頭搭的士去左QE先
去到QE產房，姑娘做左簡單檢查後就叫我地落產前房。

產前房換好哂衫，就訓係床上聽胎心機
跟住有醫生過黎檢查，佢見我都流幾多血，就提議我超ULTRASOUND
因為有胎盤前置記錄，所以醫生較緊張。
醫生都好好人，佢話已經足月，不如我地幫你催生啦，
我地當然話好，檢查完就同屋企人講，今晚會催生。

老公一直都陪住，又SEND WHATSAPP 通知大家我即將分娩
去到八點幾，要開始抽血，話說1/7 係實習醫生第一日返工既日子
而我就唔好彩地撞正個唔多識抽血既實習醫生，
佢手騰腳震幫我吉左好多針都失敗...痛到我...
最後由一位護士姑娘出馬，一次就得左..

(待續)

[二十五週三] 產檢@私家．5

今日去孫醫生產檢，等左兩個半鐘
而家馬馬重1磅8，整體週數細一週，頭圍依然細左兩週
仲見到個頭俾胎盤夾扁左，唉....
醫生就安慰話BB出產道都會夾扁，叫我唔駛太擔心喎。
點會唔擔心，個頭喎，驚有影響麻
胎盤依然係二至三級前置，醫生話唔係最嚴重，
都係個句，一有流血就要即刻入院。
希望個胎盤升得返，其實我唔介意開刀，
個胎盤升返一至二級我都算架啦

其實我食好多野，但馬馬就係唔多吸收，
重就重哂落我度，不過醫生話見馬馬生左頭髮
下次再私家產檢就係三十週啦，希望馬馬重返多D啦~

最近，教會兩位好姊妹都生左BB，聽返佢地生產過程
又驚又喜，不過見到好可愛既BB，佢地話咩痛苦都唔記得。

[二十四週二]

開始踏入二十四週，胎動多了，身子也變得重

有時都很論盡，不過每次當感覺到胎動，都感到無比的興奮

其實馬馬的胎動唔算多，唔知係咪囡，會比較斯文呢?

多數係新係床上或坐低才有輕微胎動。

有次老公FEEL 到佢旭旭下，好快就唔旭。

而因為馬馬已經確定係囡，我起初都同自己講，唔駛買衫住

身邊已有朋友話俾衫仔、床仔、車仔我地....

但最後行行下街見到有粉紅色既衫仔就忍唔住入貨

當係街見到賣BB用品又忍唔住入去睇。

唔怪得人地話生囡係會洗好多錢。

[二十二週四] 公立．照結構

感恩可以係公立醫院照結構，聽講其他醫院未必俾妳照
但QE 就多數都有得照，唔知係咪因為大醫院呢
等左一個鐘就入得去，今次由醫生親自照，
個醫生好好人，由於我地係LUNCH TIME 前最後一個，
個醫生就問「等左咁耐，妳肚唔肚餓呀」「出面無人，我地可以慢慢照」
細心程度好過私家醫生。

照既過程，醫生好細心咁講解佢既身體各部份結構
但馬馬就係全程遮住塊面，係咪咁怕羞呀..
記得上次照ULTRASOUND 就將手擺左係頭頂
醫生話一切正常，但個頸細左週幾，個身就細左幾日，
醫生話係正常範圍，同埋我個人比較細粒，馬馬偏細都唔出奇
不過胎盤都係低，要繼續觀察，醫生話有機會升返

馬馬重量: 463g

夜晚同朋友仔去迪迪尼食自助餐
由於我一直都擔心馬馬的腦部發展，個頭比較細
所以轉攻食熟既三文魚
食到飽飽~

[二十二週一] 胎動

自從上次私家產檢後一日，開始感覺到有胎動
自此，每日都留意胎動的情況
我覺得馬馬很斯文，每日胎動的頻率及覆度都較少
很多時都極不明顯
 不過今晚返團契，福音茶座時，聽到陳芳榮先生唱詩歌就明顯感覺到胎動。

希望馬馬是一位愛音樂、愛唱詩歌讚美神的小孩。

[二十週]產檢@私家．4

一直期待胎動的日子，但等了又等，到今日二十週仍未感胎動
開始有點擔心，結果去了私家做產檢

余醫生一開始照頭圍，頭圍細了兩週
聽後好擔心，醫生話仍需要再觀察，現時未有結論
其他部份發展正常，但羊水較少
胎盤仍低，醫生表示係二至三級
胎盤低也會影響BB對營養的吸收
所以BB而家只有365g, 正常起碼應該有400g.

產檢完很不安，擔心馬馬腦部發展唔正常或有其他問題。
第一次為馬馬喊，原來懷孕期都要順利通過不同的考驗
一黠也不容易
一個BB可以健康正常出世發展，已是值得感恩。

下個月去QE 照結構，希望到時可以順利

[十七週三] 產檢 @ 私家醫生．3

今日去孫錫鴻私家醫生產檢
預約時間為1530，因為容易頭暈，唔敢周圍行
只到附近買賀年禮盒就返上去診所
1800老公黎到，仲未未有得見醫生
見到好多孕婦到，護士話要等起碼三小時
我地結果1930先有得見醫生

可能人多關係，醫生好趕，講野好快
十分鐘內解釋完，醫生話我有胎盤前置三級
如果升唔返就要準備開刀

[十六週三] 暈眩

進入十三週後，胃口相對之前好好多
之前有好多有營養的食物，蛋呀、魚呀，通通食唔落
只想食公仔麵、薯片同埋炸雞。死未!

十六週後，胃口好了，就食返有營養食物
否則對馬馬唔住

今日十六週三，唔知係行得太快定係拿重物
竟然暈眩，天旋地轉，過完馬路，立即搵地方坐
抖左十五分鐘又無事
下午家訪完，在電梯內又暈，今次較嚴重，連眼鏡跌左都唔知
但仍有意識站起來出電梯，
去到屋企門口，連鎖匙都開唔到
返到屋企先發現唔見眼鏡
好在係管理處搵返
夜晚老公接我返屋企途中又暈
立即去M記坐
本來老公想我去急症室
但一想到唔知等幾耐就唔想去
結果返屋企休息

老公上網CHECK 返，原來孕婦出現暈眩係正常

孕期的暈眩與昏倒，
主要是跟循環系統之心臟是否可以
送出足額的血量給腦部組織有關，

當姿態或子宮壓迫導致下身血液回流不佳時，
就容易發生這些不適與意外。

但是也要注意其他疾病異常的可能性，

例如可能有高達百分之十五的年輕女性
有些許心臟僧帽瓣脫垂的情形，

平時少有明顯的症狀，
懷孕期間少數有心悸、呼汲困難及昏倒等症狀。

如果透過動作放慢，改正不良姿劫與足夠的休息，

症狀仍不能改善甚至越來越嚴重的話，
就需要對您的循環系統作更詳細的評估。

如果您的暈眩是屬於天旋地轉型的，再加上有耳鳴的現象，

那麼您耳朵的平衡系統也需檢查一下。
所以針對此種突發不適，

需注意發生狀況時，您正在做什麼？
有無預警訊號或及其他合併的異狀？

搜齊資料以供醫生參考較能找出原因。

[十五週六] 請陪月

早在我五週時，已經開始搵陪月
由於唔敢搵AGENT 介紹個D，唯有搭路問朋友
當時未夠三個月，其實唔多想俾人知，不過無辦法啦
結果由我朋友既朋友就介紹左個叫ANN 既陪月

今晚同老公係會所見陪月
初步印象可以，我要求係要清潔衛生、
食物要少油少鹽、可以幫我上奶、唔好太多野講等
坐月就係想舒服點，可以休息下，有人幫下手
唔想老人家辛苦

不過都好貴，俾完訂金，有點肉痛
所以同老公講，係政府生，將D錢請陪月啦
希望呢個陪月OK!

[十四週一] 產前檢查@私家

起床後，感到身體仍不適，決定請病假
又唔多放心肚入面馬馬
一黎我身型細小，但個肚就異常大
很多朋友一見我就以為我有左五個月
我開始諗...馬馬正唔正常，會唔會羊水太多
太多的擔心，最後決定睇私家
但本身睇開孫醫生要等到最快下星期五
我決定先睇另一個私家醫生
佢係余若薇細佬余若星醫生
即日BOOK 都有位

余醫生係老一輩醫生，好有經驗，但亦好傳統
佢好詳細解釋馬馬每個身體部份














仲錄埋影錄埋音
總共十分鐘
見到馬馬有心跳 bmp: 183
仲好活躍，即時放心哂

而家馬馬身長8.02 cm
比上兩個星期長左2cm

之後醫生解釋我個肚大既原因
就係...胎盤低 =.=
究竟胎盤低有乜野影響
醫生就現階段未有好大影響
但如果持續胎盤低就一定有問題
可能要開刀
中間其實都無咩好做

[十四週] 病倒了

祝大家新年快樂

十四週，卻患上感冒，一於以往上呼吸道感染
一直都不希望睇醫生食藥
怕會影響馬馬，所以上網研究自然療法
希望可以早日康復

檸檬加鹽

先將檸檬切片
加鹽再加暖水
簡單方便
之後就訓訓訓